Heb 5 | APZ | STEP | A'amu Jutaso hofɨko'njo mta'ango hwe fihumo uhwosopo'mentohofo sohwo syoho ole imentisofoho. Kako a'amu hisofe wonyo honɨngkanomne'no Anɨtumo syoho ulohofiyonto yahu fonjokisasyonto yahu'nji yo'mayo so'nji Anɨtu uhwonyo'ne kisɨ'meehumentisofoho.

Hebrews 5

Jisas kako nakwo'nji Anɨtumo ufohi'nyo'ne sohwo asomo netɨmayo'ne hwapɨngo hweho.

1 A'amu Jutaso hofɨko'njo mta'ango hwe fihumo uhwosopo'mentohofo sohwo syoho ole imentisofoho. Kako a'amu hisofe wonyo honɨngkanomne'no Anɨtumo syoho ulohofiyonto yahu fonjokisasyonto yahu'nji yo'mayo so'nji Anɨtu uhwonyo'ne kisɨ'meehumentisofoho. 2 Oso hwe huhwo sohwo kako hwahoponjo a'amu hweho. Kako sɨhune fehohnjo somo honɨngkano wonyo imentisofoho. Oso'no a'amu huno nto'no mosyafɨsiyo'njo somo u a'amu Anɨtuye honɨngkanomne'no inɨngo mo'nyo somo kako hofohofahn'no ulohofɨhwosi ufo'ma'montonoho. 3 Kako hofɨko pa'nyo hwo'manji kakoe wonyo honɨngkanomne'nji a'amufe wonyo honɨngkanomne'nji Anɨtumne'no yahu fonjokisasyɨwo'nɨngkiso hweho.

4 Hwe fihwo ole monalonehoho. Ngko Anɨtumne'no a'amu somo ufo'mayo'ne yofe engo woma'mo. Ose malonehoho. O'o, Anɨtu kako Eloun Mousesɨye kola'wehwo sohumo uhwosopo'mentiso hopaso uhwosopo'montonoho.

5 Kɨlais huhwo kako ose'nohinoho. Kako ole malɨmmentisofoho. Ngko a'amu ufo'mayo'ne yofe engo woma'mo. O'o, ose malɨmmentisofoho. Anɨtu kako ole ulɨmento,

Kɨko nje Hwomu hwosoho.
Olohonta ngko jɨje Mpohwo'nyoho.
6 Ose ulɨmentisoso nom'nepo Anɨtu ole ulɨmento,

Kɨko a'amu ngkimo motanɨfohi'nyo'ne syohoso Melɨkisetek imentiso hopaso ne'no yohotnne hwosoho.
Ose ulɨmentisofoho.

7 Hohonta Jisas kako nakwo a'amu lohn'nwi pa'nyo imo'nonto nakwoe hwahopo humamentiso sohonta kako Anɨtumo humotaho'nji yokumpohn'nyo jomo ulɨmojo hweho. Anɨtu kako'nohini Jisasɨmo poyo pe'nyoso'no ufo'mayo'ne hweho. Jisas kakoe hunomne'no hi inyoso monje yasyonto kako Anɨtumo inɨngkayo so'no hi umo'nɨngkahonɨngki Anɨtumo enjwa'mo humamentiso so'no Anɨtu Jisasɨmo ufo'ma'mentisofoho. 8 Jisas kako Anɨtuye Hwomu hweho. I oso'no kako nohumanto Anɨtuye hungkunomo haloho peso'no tohino engo ma'mentisofoho. Tohino engo nomanto kako Anɨtuye hungkunomo haloho po'mentiso so'no huno engo tɨpema'mentisofoho. 9 Yo'mayo tohino u'mahonɨngki kako wonyo honɨngkano nɨhu'no mimmentisofoho. Oso'no kako wopɨngo'nohini nohumanto kako engolopohamo nakumo nefo'mayo'ne hwapɨngo hweho. Nakwo kakoe hungkunomo haloho'no pewo'nɨngkuhwone hn'nɨmo kako nakumo asomo netɨmaso sohonta songo ne'no nohumentɨhwanefoho. 10 Oseso Anɨtu Jisasɨmo ulɨmento,

Kɨko a'amu ngkimo motanɨfohi'nyo'ne syohoso Melɨkisetek imentiso hopaso ne'no yohotnne hwosoho.
Jisasɨmo ose ulɨmentisofoho.

Nakwo mehomi we'eso humawo'nɨngkohofo hopa humehwaloho.

11 Nakwoe Hwe Engo Jisas nakwoe wonyo wae enaofo'ne sohune'no hungkuno pi'nɨngo engo woselontane'no ihwono. I oso'no sekwoe hunoso pito'nnyo'njo kuyoho. Huno nto'no mehohosahinyo kuyoho. Oso'no nakwo olo hungkuno hwapɨngoso pipi losetɨhwanehwono. 12 Sekwo Anɨtuye hungkuno hohonta upa'nɨmentohofo soku olohonta sekwo nom'ne somo molutɨhwayoso peho'neto. Sekwoe hunoso tɨfo'njo kuyoho. Oso'no hwe fihwo kako Anɨtuye hungkuno hwapɨngo neso apa'no wolosetɨhwano. Sekwo Anɨtuye hungkuno neso wosopayo yokumpohn'nyo hopaso manɨfitnnehofo. O'o, amno'nohino nalokwofo. 13 Nakwo huno nayohoho. A'amu fihwo amno'nohini nɨwo'nɨngkiso sohwo kako mehomi pa'nyo hweho. Mango ane pa'nyo hweho. Honɨngkano wopɨngomo inɨngkayo'ne huno nto'no muyo hweho. 14 U wosopayo yokumpohn'nyoso a'amu engo huno'njo sohwafefoho. Oso a'amu huhwo sohwo kako Anɨtuye hungkunomne'no huno ne'no syafɨsyɨwo'nɨngkiso sohwo kako honɨngkano wopɨngo so'nji wonyo so'ntnno huno nto'no ehohosahinyo hweho.